Əməliyyatın əsl səbəbi | Yəməndə aeroport, Qəzzada düşərgə məhv edildi

Yəmənin paytaxtı Sənada yerləşən beynəlxalq aeroport İsrailin hava zərbələri nəticəsində tamamilə dağıdılıb. Bütün mülki təyyarələr məhv edilib.

Bu barədə “Əl Yemen” telekanalı məlumat yayıb.

İsrail tərəfi bu hücumun Yəmən husilərinin Təl-Əvivin Ben Qurion Hava Limanını hədəf almasına cavab olduğunu bildirib. Bu həm də Yəmənə qarşı hücumların ikinci dalğasının başladılması deməkdir.

İsrail iki cəbhədə savaşı davam etdirir. Bir tərəfdən husilər, digər tərəfdən isə hələ də Qəzza zolağını tərk etməyən HƏMAS yaraqlıları ilə mübarizə davam etdirilir. Belə ki, İsrailin Bureyc qaçqın düşərgəsində sığınacağa çevrilmiş məktəbə zərbə endirməsi nəticəsində 22 fələstinli ölüb, daha 52 nəfər yaralanıb.

İsrailin fikrincə, düşərgədə silahlılar gizlənir. Onlar düşərgəni və dinc sakinləri özlərinə qalxan kimi istifadə edirlər.