Əraqçi Hörmüzdə keçidin bərpa olunmasının şərtlərini açıqladı - Baku TV

İranın xarici işlər naziri Abbas Əraqçi BMT Baş katibinə, BMT Təhlükəsizlik Şurasının sədrinə və quruma üzv ölkələrə məktub ünvanlayıb. Məktubda ABŞ və Bəhreynin BMT Təhlükəsizlik Şurasına təqdim etdiyi qətnamə layihəsinə cavab bildirilib.

Qeyd olunur ki, Hörmüz boğazında normal keçid müharibənin daimi dayandırılması, eləcə də İran əleyhinə qanunsuz blokada və sanksiyaların aradan qaldırılması şərti ilə bərpa olunacaq.

Əraqçi məktubunda ABŞ və Bəhreynin Hörmüz boğazı ilə bağlı birgə qətnamə layihəsini birtərəfli və natamam sənəd adlandırıb. O, bölgədə mövcud böhranın əsas səbəbinin ABŞ və İsrailin İrana qarşı hərbi hücumları və qanunsuz addımları olduğunu vurğulayıb.

Sənəddə əlavə olur ki, sözügedən layihə təcavüz faktlarını, dəniz mühasirəsini və İran gəmilərinin saxlanılmasını nəzərə almadan ABŞ-nin hərəkətlərinə bəraət qazandırmağı və reallığı təhrif etməyi hədəfləyir.

Əraqçi onu da qeyd edib ki, belə bir qətnamənin qəbul edilməsi BMT Təhlükəsizlik Şurasının nüfuzunu zəiflədəcək və ABŞ-nin birtərəfli addımlarının legitimləşdirilməsi üçün təhlükəli presedent yaradacaq.