Ərdoğana görə Ukrayna-Rusiya müharibəsi nə zaman bitəcək?

Türkiyə Prezidenti Rəcəb Tayyib Ərdoğan “Taxıl sazişi”nin yenilənməsi ilə bağlı Rusiya Prezidenti Vladimir Putinin 2 şərtini açıqlayıb.

Soçi səfərindən sonra təyyarədə jurnalistlərin suallarını cavablandıran Türkiyə lideri bildirib ki, şərtlərdən biri Rusiya Kənd Təsərrüfatı Bankının Türkiyənin “Ziraat Bankı”nın SWIFT sisteminə qoşulmasından ibarətdir.

R.T.Ərdoğanın sözlərinə görə, V.Putinin ikinci şərti taxıl nəqlində iştirak edən gəmilərin sığortalanması məsələsinin həllidir. Bildirilib ki, Rusiya Prezidenti ilkin mərhələdə 6 ölkəyə 1 milyon ton taxıl göndərilməsinə razılıq verib. Bundan başqa, Rəcəb Tayyib Ərdoğan Ukraynadakı müharibə üçün üfüqdə sülhün görünmədiyini açıqlayıb. Onun sözlərinə görə, Türkiyənin müharibə ilə bağlı mövqeyi aydındır.

“İlk gündən diplomatiyanın tərəfdarı olduğumuzu deyirik. Daha çox qan tökülməsinin qarşısını almağa səy göstəririk. Təəssüf ki, il yarım əvvəl başlayan müharibə hələ də davam edir”, – deyən R.T.Ərdoğan vurğulayıb ki, Türkiyənin arzusu müharibənin beynəlxalq hüququn tələblərinə uyğun formada başa çatmasıdır.