Erməni oliqarx Paşinyana od püskürdü | Mirzoyanın Rusiyaya səfəri sübut etdi ki...

“Son aylar Ermənistanla Rusiya arasında münasibətlərdə istiləşmə müşahidə olunsa da, Moskva Paşinyan hakimiyyətinə inanmır”.

Bu sözləri Rusiya Erməniləri İttifaqının rəhbəri, Kremlə yaxın olan erməni oliqarx Ara Abramyan deyib.

Onun sözlərinə görə, geosiyasi dəyişikliklər fonunda, xüsusilə də ABŞ-də keçirilən seçkidən sonra Rusiya-Ermənistan ikitərəfli dialoqunda müəyyən irəliləyiş əldə olunub.

“Bunu Ermənistanın xarici işlər naziri Ararat Mirzoyanın Moskvaya son səfəri sübut edir”, – deyə Abramyan qeyd edib.

Erməni oliqarx onu da bildirib ki, hökumətin hərəkətlərində ardıcıllıq yoxdur.

“Ortada sadəcə bəyanatlar var. Ölkə parlamenti Avropa İttifaqına üzvlük prosesinin başlanmasına dair qanun layihəsini qəbul edir. Nəyin baş verdiyi bəlli deyil. Heç nə sabit deyil. Buna görə də Paşinyana etibar yoxdur”, – deyə erməni milyarder vurğulayıb.

Ara Abramyanın sözlərinə görə, o, tez-tez Rusiya tərəfi ilə ünsiyyətdədir və qarşılıqlı dialoqlar zamanı İrəvandakı mövcud hakimiyyətin müvəqqəti olduğu söylənilir.