Ermənistan parlamentində qalmaqal yaşanıb

Ermənistan parlamentində 2026-cı ilin dövlət büdcəsinin müzakirəsi zamanı qalmaqal yaşanıb.

Belə ki, ölkənin Baş naziri Nikol Paşinyan parlamentin Müdafiə və Təhlükəsizlik Komissiyasının sədri Andranik Koçaryanı danlayıb zaldan çıxıb. Hətta parlamentin spikeri Alen Simonyan 20 dəqiqəlik gözlənilməz fasilə elan etməli olub.

Buna səbəb parlamentin Müdafiə və Təhlükəsizlik Komissiyasının sədri Andranik Koçaryanın çıxış etməli olduğu vaxt iclas zalında olmaması idi. Belə olan halda isə Paşinyan onu danlayıb və çıxışını boykot edərək zalı tərk edib.

Xoşagəlməz hadisədən danışan Andranik Koçaryan müxalifət və bəzi mətbuat orqanlarını “milçəkdən fil düzəltmək”də ittiham edib. Buna baxmayaraq, Andranik Koçaryan hökumət və həmkarlarından üzr istəyib.

“Amma katiblik diqqətli olmalı idi. Çünki bir çıxışdan sonra söz mənə veriləcəkdisə, ən azından xəbərdarlıq edilməliydi ki, zaldan çıxmayım” deyən A.Koçaryan katibliyin rəisi Tatul Soqomonyanı günahlandırıb.