Ermənistan və Rusiya gərginliyi artdı | İrəvan bunu başa düşmür ki...

Ermənistan ilə Rusiya arasında münasibətlər hər ötən gün daha da gərginləşir.

Erməni Baş nazir Nikol Paşinyanın Qərbyönümlü siyasəti nəinki Kremldə, o cümlədən Ermənistanın müxalif partiyaları arasında da ziddiyyətlə qarşılanır.

N.Paşinyanın gah “KTMT-dən çıxırıq” deməsi, gah Rusiyadan Gümrüdəki 102-ci hərbi bazanı tərk etməyi istəməsi, gah da rəsmi İrəvanın Rusiyadakı dövlət əhəmiyyətli tədbirlərdə iştirakdan boyun qaçırması bunun bariz nümunəsidir.

Zvartnots hava limanını rusiyalı hərbçilərin tərk etməsi mövzusu gündəmdən düşməmiş tərəflər arasında yeni gərginlik yaşanıb. Bu dəfə isə Rusiyanın 1-ci telekanalının efirində yayımlanan tok-şouda Rusiya Dövlət Dumasının deputatı Konstantin Zatulin Ermənistana od püskürüb.

O bildirib ki, N.Paşinyan yürütdüyü siyasətlə Rusiyanın regiondakı imicini darmadağın etməyə çalışır:

“Nikol Paşinyan hakimiyyətdə var olduqca Ermənistanın maraqları tapdanacaq. Rusiya ilə qurulmuş əlaqələr hər gün daha bir az məhv olacaq. Ölkədə küçə etirazları da anlaşılandır. Ermənistan tərəfi öz hakimiyyətinin yol verdiyi yanlışlıqları indi dolayı yolla, bəzi hallarda isə birbaşa Rusiya hakimiyyətinin üstünə atmaqla bizi günahkar çıxarmağa çalışır.

Amma onlar başa düşmürlər ki, bu gün Ermənistan adlı bir ölkənin var olmasında çar Rusiyasının və SSRİ-nin böyük rolu var. Qərbə meyillənmək qərarı özü bir səhv seçim idi. Biz heç bir ölkənin daxili işlərinə müdaxilə etmirik.

Amma münasibətlərimizin qorunmasında maraqlı olduğumuza görə onlara atacaqları addımları yaxşı düşünmələrini tövsiyə edirik. Nə qədər ki, N.Paşinyan hakimiyyətdədir, o, dost dövlətlərlə münasibətləri daha da pisləşdirəcək. Ermənistan hakimiyyəti öz xalqının maraqlarına xəyanət edir. Problem budur”.

Məlumat üçün bildirək ki, Ermənistanda artıq Rusiyanın “Birinci kanal”ının yayımı dayandırılıb. Bu barədə ölkənin Yüksək Texnologiyalar Nazirliyi məlumat verib.