Əsəd rejiminə qarşı çıxan lider ölüb? - Toqquşmalarda ilk dəfədir ki...

Suriyada müxalif qüvvələrin Bəşər Əsəd rejimini devirmək səyləri xeyli irəliləyib.

Belə ki, Şeyx Neccar bölgəsində ordu geri çəkilməyə başlayıb.

Sözügedən ərazilərə girməyə müvəffəq olan silahlı qruplaşma üzvləri orduya məxsus xeyli sayda tank və silah-sursat ələ keçirə bilib.

Baş verən toqquşmalar zamanı tərəflər bir-birinə pulemyotlardan atəş açıb. Nəticədə hər iki tərəfin itkilərinin olduğu bildirilsə də, dəqiq say açıqlanmır.

Müxalif Suriya Milli Ordusu dekabr ayının 1-də başlatdığı “Azadlıq şəfəqi” əməliyyatı çərçivəsində artıq Tell-Rifat şəhərinə daxil olub. Ümumilikdə 32 kəndi ələ keçirən, özlərini ədalət keşikçiləri kimi adlandıran üsyançılar “Əsədi devirməyənə qədər mübarizəmiz davam edəcək” deyə bəyanatlar da səsləndiriblər. Amma bəlli idi ki, Bəşər Əsəd 8 ildən sonra ilk dəfə ordusunun hakim olduğu ərazilərdən geri çəkilməsi faktını həzm etməyəcək. Etmədi də.

Belə ki, o, Heyət Təhrir əş-Şamın lideri Əbu Məhəmməd Əl-Culanini raket zərbələri ilə zərərsizləşdirdiyi xəbərini mediaya sızdırdı. Amma HTŞ-nin üzvləri “yayılan fotolardakı cansız cəsəd Əl-Culaniyə məxsus deyil, şəkildəki sadəcə onun oxşarıdır” deyərək iddiaları rədd etdilər.

Suriya ərazisində hökm sürən qeyri-sabit vəziyyət dünya ölkələrini də bu məsələdə birgə bəyanat yaymağa vadar etdi. Berlin, Vaşinqton, London və Paris hesab edir ki, Suriyadakı bütün tərəflər gərginliyi azaltmağa, eləcə də mülki əhalinin təhlükəsizliyini təmin etməyə çalışmalıdır. Bu barədə Almaniya, ABŞ, Böyük Britaniya və Fransanın Dövlət Departamentinin Mətbuat Xidməti tərəfindən dərc olunmuş birgə məlumatda bildirilir.

“Biz Suriyadakı hadisələri diqqətlə izləyirik. Bütün tərəfləri gərginliyi azaltmağa və mülki insanları qorumağa çağırırıq”, – deyə xəbərdə qeyd olunub.