Fələstin XİN-dən başda ABŞ olmaqla bəzi ölkələrə xəbərdarlıq

Fələstin lideri Mahmud Abbas Böyük Britaniyanın Fələstin Dövlətini tanımasını ədalətli və dayanıqlı sülhə aparan mühüm addım adlandırıb.

O bildirib ki, Londonda Baş nazir Kir Starmerlə görüş zamanı götürülən öhdəliklər və islahatlara sadiq qalacaq.

Mahmud Abbasın sözlərinə görə, hazırda əsas prioritetlər Qəzza zolağında atəşkəsin təmin olunması, humanitar yardımın çatdırılması, bütün girov və məhbusların azad edilməsi, İsrail qoşunlarının tamamilə geri çəkilməsi və bərpa prosesinə başlanmasıdır.

Qeyd edək ki, sentyabrın 21-də Böyük Britaniya, Kanada və Avstraliya Fələstin Dövlətini tanıyıb.

Bu arada, Fələstin Xarici İşlər Nazirliyi başda ABŞ olmaqla, hələ Fələstin Dövlətini tanımayan ölkələrə tanıma prosesinə başlamaq çağırışı edib. Kanada, Avstraliya və Böyük Britaniyanın Fələstin Dövlətini tanıdıqlarını elan etməsindən sonra Nazirlik yazılı açıqlama yayıb. Açıqlamada Fələstin Dövlətinin tanınmasının məmnuniyyətlə qarşılandığı, qeyd olunan ölkələrə təşəkkür edildiyi bildirilib. Fələstin Dövlətinin tanınmasının beynəlxalq hüquq və qanunilik qərarlarına uyğun, cəsarətli addım olduğu qeyd edilib.