Fransada terror təhlükəsi

Fransada qalmaqallı pensiya islahatının əleyhdarlarının etiraz aksiyaları davam edir.

Yüzlərlə insan Prezident Emmanuel Makronun səfər etdiyi “Loar-et-Cher” departamentinin Vandom şəhərində qatar relslərinə çıxıblar.

Sosial şəbəkədə yayılan görüntülərdə bir çox nümayişçinin birlik bayraqları ilə qatar relslərinin üzərində etiraz aksiyası keçirdiyi əks olunub. “Loar-Et-Cher” departamentinin rəhbərliyi ölkədə terror təhlükəsinin davam etdiyini və E.Makronun hədəf ola biləcəyini əsas gətirərək Fransa Prezidentinin səfər etdiyi ərazidə bundan sonra nümayişlərin keçirilməsini qadağan edib.

Qeyd edək ki, Fransada pensiya islahatına qarşı keçirilən nümayişlər həftələrdir səngimir. Təqaüd yaşının artırılması planlarına qarşı çıxan 1,1 milyon insanın paytaxt Paris və Fransanın digər şəhərlərində keçirdiyi aksiyalara baxmayaraq, E.Makron geri addım atmaq niyyətində olmadığını bildirib.