Fransada yüzlərlə etirazçı saxlanıldı

Fransada pensiya islahatına qarşı 2 aya yaxındır davam edən etirazlar zamanı yüzlərlə insan saxlanılıb. Təkcə paytaxt Parisdə 258 nümayişçi həbs olunub.

Bu barədə Fransanın "Le Figaro" nəşri məlumat verib. Bildirilib ki, saxlanılan şəxslər soyğunçuluq və yanğın törətməkdə ittiham olunurlar.

Belə ki, martın 16-da Parisin mərkəzinə toplaşan 6 min insan Fransa paytaxtının küçələrində avtomobilləri yandıraraq pensiya islahatına etirazlarını bildiriblər. Polis aksiya iştirakçılarına qarşı gözyaşardıcı qaz və su şırnaqlarından istifadə edib.

Qeyd edək ki, etirazlara səbəb Fransanın Baş naziri Elizabet Bornun pensiya yaşının 62-dən 64-ə qaldırılmasını nəzərdə tutan qanun layihəsinin səsvermə yolu ilə qəbul edilməsinə qərar verməsi olub.