Fransanın sabiq prezidenti nədə ittiham olunur?

Fransanın sabiq prezidenti Nikola Sarkozi 5 il müddətinə həbs cəzasına məhkum edilib. Bu hökm onun yaxın köməkçilərinin 2007-ci il prezident seçkiləri kampaniyası üçün Liviyanın mərhum lideri Müəmmər Qəddafinin hakimiyyəti dövründə – maliyyə əldə etməyə çalışmaları ilə bağlıdır.

N.Sarkozi Paris məhkəməsi tərəfindən digər bütün ittihamlardan, o cümlədən korrupsiya və qeyri-qanuni kampaniya maliyyələşdirilməsi üzrə bəraət alıb. Lakin hökmə əsasən, keçmiş prezident apellyasiya versə belə, həbsdə qalacaq. Bu isə bir çoxlarının gözlədiyindən daha sərt cəza sayılır.

İttihamları hər zaman inkar edən N.Sarkoziyə qarşı irəli sürülən iddiaya görə, o, 2005-ci ildə Fransa daxili işlər naziri olduğu dövrdə beynəlxalq arenada təcrid olunmuş Liviya hökumətinə dəstək vermək müqabilində M.Qəddafi ilə kampaniya maliyyəsi almaq üçün razılaşma əldə edib. Yaxın köməkçilərinin maliyyə əldə etmək məqsədilə Liviyadakı şəxslərlə əlaqə qurmasına şərait yaratdığına görə, N.Sarkozi cinayət xarakterli sui-istifadədə təqsirli bilinib.

70 yaşlı eks-prezident 2025-ci ilin yanvarından bəri məhkəmə qarşısına çıxarılır və prosesi siyasi motivli sayır. Həmçinin 2024-cü ildə apellyasiya məhkəməsi onun 2012-ci ildə uğursuz yenidən seçilmə kampaniyasına görə qeyri-qanuni maliyyələşdirmə ittihamı üzrə ayrı bir hökmü də qüvvədə saxlayıb. Bu iş üzrə Fransa Ali Məhkəməsinin yekun qərarı oktyabrda elan olunacaq.