Gerasimov Putinə məruzə etdi | Kursk əməliyyatı barədə detallar

“Rusiya Silahlı Qüvvələri Kursk vilayətinin nəzarət altına alınması üzrə əməliyyatı başa çatdırıb, Prezident Vladimir Putin Baş Qərargah rəisi Valeri Gerasimovdan müvafiq hesabat alıb”.

Bu barədə Rusiya Prezidentinin mətbuat katibi Dmitri Peskov məlumat verib.

“Valeri Gerasimov Ali Baş Komandan Vladimir Putinə Kursk vilayəti üzərində nəzarətin bərpa edilməsi üzrə əməliyyatın başa çatması barədə məlumat verib”, – deyə D.Peskov qeyd edib.

V.Gerasimov məruzəsində Prezidentə bildirib ki, Ukrayna Silahlı Qüvvələri məğlub olub və aprelin 26-da Kursk vilayətində sonuncu yaşayış məntəqəsi olan Qornal Rusiya Silahlı Qüvvələrinin nəzarəti altına keçib. Əməliyyat ümumilikdə 264 gün davam edib:

“Kursk vilayətində döyüşlər zamanı Ukrayna Ordusu 76 mindən çox hərbçisini itirib. Bu siyahıya ölənlər və yaralananlar daxildir. 7700-dən çox hərbi texnika, 412 tank, 340 döyüş avtomobili və digər hərbi sursatlar məhv edilib.

Ayrıca olaraq Şimali Koreya qoşunlarının Kursk vilayətindəki əməliyyatlarda iştirak etdiyini bildirmək istəyirəm. Koreya Xalq Demokratik Respublikasından olan döyüşçülər ölkələrimiz arasında imzalanan strateji əməkdaşlıq sayəsində bizə öz köməkliklərini göstəriblər. Onlar Kursk vilayətinin azad olunması əməliyyatında yüksək peşəkarlıq nümayiş etdiriblər”.

Valeri Gerasimov əlavə edib ki, Sumı vilayətində təhlükəsizlik zonası yaradılır, dörd yaşayış məntəqəsi azad olunub və 90 kvadratkilometrlik ərazi Rusiyanın nəzarətinə keçib.