Gürcüstan kənardan idarə olunmur | Kobaxidzedən Rusiya barədə ittihamlara sərt reaksiya

“Gürcüstan hakimiyyətinin Rusiyayönlü olmaqda ittiham edilməsinin izahı var. Gürcüstan bu gün kənardan idarə olunmur, hakimiyyətin bütün qolları agentlərdən təmizlənib, “Gürcü Arzusu” suverenliyi müdafiə edir, LGBT təbliğatına yol vermir və müharibəyə cəlb olunmur”.

“Teleqraf”ın yerli bürosu xəbər verir ki, bunu Gürcüstanın Baş naziri İrakli Kobaxidze “Facebook” səhifəsində yazıb.

ABŞ-nin Milli Kəşfiyyat İdarəsinin rəhbəri Tulsi Qabbardın bəyanatını şərh edən hökumət başçısı qeyd edib ki, müxtəlif ölkələrdəki opponentlərin Rusiya ilə əlaqələrdə ittiham edilməsi “dərin dövlət”in dəsti-xəttidir:

“Dərin dövlət” hakim partiyanın təsisçisi Bidzina İvanişviliyə qarşı güclü təbliğat xətti yönəldib. Bidzina İvanişvilinin ünvanına Rusiyayönlü olması ittihamları səsləndirilir, lakin heç kəs ictimaiyyətə bu cür faktları təqdim etməyib”.

Baş nazir “Gürcü Arzusu” ilə mübarizənin belə alətlərini düşmən obrazının yaradıldığı və daha sonra opponentin onunla əlaqədə ittiham edildiyi “Gebbels metodu” adlandırıb.

“Bu cür təbliğat heç bir fakt tələb etmir. Əsas odur ki, təbliğat total xarakter daşısın və ittihamlar daha çox agent tərəfindən təkrarlansın”, ‒ İ.Kobaxidze yazıb.

Qeyd edək ki, T.Qabbard sübutlar təqdim edərək bildirib ki, 2016-cı ildə Rusiyanın ABŞ-dəki seçkilərə müdaxilə etməsi ilə bağlı ittihamları Donald Trampın qələbəsindən narazı qalan Barak Obama uydurub.