Hakan Fidan Rubio ilə danışdı

Türkiyənin xarici işlər naziri Hakan Fidan və ABŞ dövlət katibi Marko Rubio arasında telefon danışığı baş tutub.

Danışıq zamanı H.Fidan Türkiyənin sülhə töhfə verməyə hazır olduğunu bildirib.

Ölkə mediasının məlumatına görə, ABŞ Prezidenti Donald Trampın rusiyalı həmkarı Vladimir Putinlə Alyaskadakı görüşü və Vaşinqtonda Ukrayna Prezidenti Volodimir Zelenski və bir sıra Avropa liderləri ilə birgə keçirilən görüşün nəticələri qiymətləndirilib.

Rusiya və Ukrayna arasında müharibəyə son qoymaq üçün gələcək addımlar müzakirə edilib. Xarici işlər naziri Ankaranın ədalətli və davamlı sülhə nail olmaq üçün lazımi dəstəyi verməyə hazır olduğunu bir daha vurğulayıb.

Qeyd edək ki, telefon danışığı zamanı Qəzzada mövcud vəziyyət və atəşkəs də müzakirə edilib. Hakan Fidan Qəzzada çox gecikmədən qalıcı atəşkəsin əldə olunmasını gözlədiyini və regiona humanitar yardımın təcili və fasiləsiz şəkildə çatdırılmasının vacibliyini vurğulayıb.

Bundan əlavə, Suriyadakı son hadisələr də müzakirə olunub. Dəməşqdə sülh və birliyin vacib olduğu vurğulanıb.