Hətta Ermənistanda da tənqid olundular | Paşinyan komandasının ABŞ-də tədbirdə iştirakı

Ermənistan hakimiyyəti bir tərəfdən Erməni Apostol Kilsəsini hədəf alır, ona qarşı təzyiqlər göstərir, digər tərəfdən isə dövlət büdcəsindən böyük vəsait ayıraraq Baş nazir Nikol Paşinyanın rəhbərlik etdiyi nümayəndə heyətini ABŞ-də dini tədbirə göndərir.

Bu barədə yerli “Joxovurd” qəzeti məlumat yayıb.

Fevralın 1-dən etibarən N.Paşinyan, həyat yoldaşı və onu müşayiət edən şəxslər ABŞ-yə səfər ediblər. Onlar fevralın 3-dən 7-dək Vaşinqtonda keçirilən Beynəlxalq Dini Azadlıqlar Sammiti və Milli Dua Səhərində iştirak edirlər. Formal olaraq bu tədbirlər N.Paşinyanın Vaşinqtona səfərinin əsas səbəbi kimi göstərilir.

“Baş nazirin bu tədbirdə iştirak etməsi başa düşüləndir, lakin özünü açıq şəkildə ateist elan etmiş deputat Arsen Torosyanın orada olması ciddi suallar doğurur. A.Torosyan bir vaxtlar açıq şəkildə “Mən ateistəm, sualınız var?” deyərək “İncil”i sadəcə bir kitab adlandırmış və onu Şarl Perronun nağılları ilə müqayisə edib.

Bəs A.Torosyan hansı məntiqə əsasən dini tədbirdə iştirak etmək üçün Vaşinqtona göndərilib? Bu, inanclı insanlara istehza, ABŞ-yə hörmətsizlik, yoxsa öz prinsiplərinə zidd davranışdır?

Maraqlıdır ki, A.Torosyanın ABŞ-yə səfəri dövlət büdcəsi hesabına həyata keçirilib. Onun bütün xərcləri – gündəlik təzminat, yaşayış və aviabilet xərcləri tam şəkildə kompensasiya olunub”, – deyə yazıda qeyd olunub.