Hindistanda axtarış-xilasetmə işləri davam edir

Hindistanın şimal-şərqindəki Assam ştatında daşqınlar nəticəsində ölənlərin sayı daha 3 nəfərin cəsədinin tapılması ilə 78-ə çatıb.

Bu barədə ştatın Fövqəladə Hallar İdarəsinə istinadən Hindistan mediası məlumat yayıb.

Bildirilib ki, 300 mindən çox sakin fəlakət zonasındadır. Eyni zamanda, 551 yaşayış məntəqəsi su altında qalıb. Ən ağır vəziyyət təbii fəlakətdən 137 mindən çox insanın zərər çəkdiyi Çaraydeo dairəsində davam edir. Daşqınlar yollara, yaşayış evlərinə, məktəblərə və digər infrastruktura ziyan vurub.

Rəsmilər bildirib ki, daşqınlardan 1,1 milyondan çox insan zərər çəkib. Hazırda 8 nəfərin itkin düşdüyü qeyd olunur. Məlumata görə, bölgədə zərərçəkənlərə yardım göstərilməsi üçün 1718 yardım mərkəzi fəaliyyət göstərir. Axtarış-xilasetmə qrupları isə ərazilərdə işlərini davam etdirir.

Hindistan Meteoroloji Departamenti yaxın günlərdə hava şəraitinin daha da pisləşəcəyi barədə xəbərdarlıq edib. Proqnozlara əsasən, növbəti 3-4 gün ərzində Assamın müxtəlif bölgələrində güclü yağışların davam edəcəyi gözlənilir. Yerli hakimiyyət orqanları əhalini diqqətli olmağa və zəruri hallar istisna olmaqla səfərlərdən çəkinməyə çağırıb.