İqlim anomaliyalarının təhlilində yeni metod

Almaniya İqlim Hesablama Mərkəzinin, Böyük Britaniyanın və İspaniyanın alimləri əvvəllər məlum olmayan ekstremal iqlim hadisələrini aşkarlayıblar.

Neyroşəbəkələrdən istifadə edərək alimlər son dərəcə isti və soyuq gündüzlər, gecələr haqqında tarixi məlumatları bərpa ediblər.

İstifadə olunan metod “Climate Reconstruction Artificial Intelligence” adlanır. Hətta qütb bölgələrində və ya Afrikadakı seyrək meteoroloji stansiyalar kimi məlumat çatışmazlığı olan regionlar üçün də iqlim anomaliyalarının təhlilində yüksək dəqiqlik nümayiş etdirilib.

Araşdırmada 1901-2018-ci illəri əhatə edən məlumatlar istifadə edilib. İş 1911-ci ilin isti dalğası, 1929-cu ilin son dərəcə soyuq qışı kimi nadir iqlim hadisələrini müəyyənləşdirib.

Əvvəllər bu hadisələr meteostansiyalarda kifayət qədər məlumat olmadığı üçün ara-sıra xatırlanırdı. Tədqiqat müəllifləri vurğulayırlar ki, süni intellektin iqlim elminə tətbiqi ekstremal hadisələrin qlobal təhlili üçün əsas vasitəyə çevrilə bilər.