İrana qarşı qurulan plan | Tramp “Qəzza planı”ndan əl çəkəcək?

ABŞ və Səudiyyə Ərəbistanı 600 milyard dollardan çox məbləğdə sazişlər imzalayıb və bu, iki ölkənin iqtisadi əməkdaşlıq tarixində ən böyük sövdələşmədir.

ABŞ və Səudiyyə Ərəbistanı arasında imzalanan müdafiə müqaviləsinin dəyəri 142 milyard dollardır. Səudiyyə Ərəbistanına veriləcək silahlar əsas etibarilə İran və husilərlə mübarizə üçün lazımdır. Sahil və hava müdafiəsi gücləndiriləcək.

İmzalanan sazişlər ABŞ-nin bölgədəki rəqiblərini zəiflətməyə yönəlmiş addım kimi xarakterizə oluna bilər. Vaşinqton İranın bölgədəki fəaliyyətindən ciddi şəkildə narahatlıq keçirir.

Nüvə proqramı ilə bağlı Omanda aparılan danışıqların müsbət istiqamətdə getdiyi bildirilsə də, bu ölkədən gələ biləcək zərbələr regionda ciddi gərginliyə səbəb ola bilər. Buna görə də İrana qarşı əsas güc olan Səudiyyə Ərəbistanı ilə əlaqələrin inkişafı ABŞ üçün prioritetdir.

Bu müqavilə ilə Donald Tramp eyni zamanda Rusiya və Çinin Səudiyyə üzərində təsirini də azaltmış oldu. Ər-Riyad ABŞ ilə bərabər, İsraillə də münasibətləri gücləndirir.

Hazırda Ərəb dünyasının gözlədiyi Qətər və Səudiyyə Ərəbistanının bu müttəfiqlikdən Fələstin məsələsinin həllində istifadə edib-etməyəcəyidir. Məhəmməd bin Salman D.Trampı "Qəzza planı"ndan vaz keçməsi üçün razı salmağa çalışacaq.

İstənilən halda imzalanan saziş ABŞ-nin Yaxın Şərqdəki mövqelərinin gücləndirilməsi və Səudiyyə Ərəbistanının Ərəb dünyasının lider dövlətinə çevrilməsi ilə nəticələnəcək prosesin başlanğıcıdır.