İranda kütləvi etirazlar | Tehran iğtişaşların qarşısını ala bilmir - Baku TV

İranın şimalında iqtisadi çətinliklərə qarşı keçirilən ümumxalq nümayişləri zamanı etirazçılar İran bayrağını cırıblar.

“Azad İran” “Telegram” kanalının məlumatına əsasən, İlam əyalətinin Sirvan şəhərində əhali ümumi tətilə çıxaraq mağazaları bağlayıb və küçələrdə etiraz aksiyası keçirib.

Eyni zamanda Şirazda etirazçılarla təhlükəsizlik qüvvələri arasında qarşıdurma baş verdiyi bildirilir. Məlumata görə, qəzəbli nümayişçilər əllərində daşlarla silahlı təhlükəsizlik qüvvələrini geri çəkilməyə məcbur ediblər.

Bundan başqa, “Keşavərzi” Bankının binasının qarşısında etiraz aksiyası keçirilib. Aksiya zamanı etirazçılar bank binasına daxil olaraq orada olan bütün kağız sənədləri dağıdıblar.

İranda kütləvi iğtişaşlar 27 əyalətin 92 şəhərinə yayılıb. Son 10 gün ərzində 300-ə yaxın nöqtədə etiraz aksiyaları keçirilib. Etirazlarda 38 nəfər ölüb, 2076 nəfər həbs edilib.

Ölkənin paytaxtı Tehran da daxil olmaqla, 16 böyük şəhərdə nümayişlər keçirilib. Polis zabitlərinin ölüm xəbərləri isə daima yenilənməkdədir.