Rusiya Ukraynanın 670 təyyarəsini məhv edib?

“Ukrayna Prezidenti Volodimir Zelenski təhlükəsizlik zəmanətləri ilə bağlı danışıqlar aparmaq məqsədilə ABŞ-yə səfər etməyə hazırdır”.

Bu barədə Ukraynanın xarici işlər naziri Andrey Sibiqa “RBC-Ukraine”ə açıqlamasında bildirib.

O vurğulayıb ki, səfər ABŞ tərəfindən müvafiq siyasi siqnal verildiyi təqdirdə baş tuta bilər.

Nazir qeyd edib ki, hazırda bir sıra istiqamətlər üzrə irəliləyiş əldə olunub. Bunlara sənədlərin məzmununun razılaşdırılması, onların hüquqi mahiyyətinin anlaşılması, eləcə də yekunlaşdırma üçün addımların ardıcıllığı daxildir.

Bu arada Rusiya Ukrayna Ordusunun itkiləri haqda məlumatı yeniləyib.

Müdafiə Nazirliyinin rəsmi nümayəndəsi İqor Konaşenkovun sözlərinə görə, indiyə qədər qarşı tərəfin 670 təyyarəsi, 283 helikopteri, 108 206 PUA-sı və 645 zenit-raket kompleksi sıradan çıxarılıb.

Bundan başqa, Ukraynanın 27 020 tank və digər zirehli texnikası, 1637 reaktiv yaylım atəş sistemi, 32 463 artilleriya və minaatanı, həmçinin 51 287 xüsusi hərbi avtomobil texnikası məhv edilib.