İranda polad istehsalı obyektlərinin 70 faizi məhv edilib | Netanyahudan mühüm açıqlama - Baku TV

“ABŞ və İsrailin aviazərbələri nəticəsində İranda polad istehsalı obyektlərinin 70 %-i məhv edilib”.

Belə bir açıqlama ilə İsrailin Baş naziri Benyamin Netanyahu çıxış edib.

Onun sözlərinə görə, birgə əməliyyatlar nəticəsində İranın ən mühüm infrastrukturuna və ölkənin sənaye bazasına dəfələrlə zərbələr endirilib.

“Biz komandirləri öldürürük, körpüləri, infrastruktur obyektlərini bombalayırıq. Bu, SEPAH-ı həm maliyyə resurslarından, həm də çox sayda silah istehsal etmək imkanından məhrum edən böyük nailiyyətdir”, – deyə B.Netanyahu qeyd edib.

Bu arada Pakistan Baş nazirinin müavini və xarici işlər naziri Məhəmməd İshaq Dar Səudiyyə Ərəbistanı xarici işlər naziri Faisal bin Farhan Al Saud ilə telefonla danışıb.

Nazirlər regiondakı son hadisələr ətrafında fikir mübadiləsi aparıb, gərginliyin azaldılması və dialoqa ehtiyacın olduğunu vurğulayıblar.

Bundan əlavə, Fars körfəzi və Yaxın Şərqdə sülh üçün 5 bəndlik Pakistan-Çin təşəbbüsü də müzakirə edilib.