İranla vəziyyət niyə məhz Trampın dövründə gərginləşdi? - Pərdəarxası məqamlar

İrana birbaşa hücumdan sonra bütün dünyanın diqqəti ABŞ-yə yönəlib. Daha dəqiq desək, Prezident Donald Trampa.

Tramp Ağ Evin əvvəlki liderlərindən fərqli olaraq, nüvə obyektlərini vurmaqda qərarlı idi və buna nail oldu. SEPAH generalı Qasım Süleymani də onun prezidentliyi dövründə öldürülüb. Lakin 2020-ci il yanvarın 3-də.

Bəs sabiq ABŞ prezidentlərinin İranla bağlı fikirləri necə olub?

Keçmiş Ağ Ev lideri Corc Buş İranı şər oxunun bir hissəsi adlandırıb. Barak Obama isə sabiq İran prezidenti Həsən Ruhani ilə danışıqlar keçirib. İranın nüvə proqramına dair razılığın əldə olunması üçün təşəbbüs göstərib.

Cozef Bayden isə 2021-ci ildə hakimiyyətə gələndə onun administrasiyası İranla danışıqlara fokuslanıb. Lakin bütün bunlar nəticəsiz qalıb.

Donald Tramp yenidən prezident seçiləndə İranın ali lideri Ayətullah Əli Xameneiyə məktub göndərib. Tramp ABŞ-nin İranın uran zənginləşdirməsinə icazə verməyəcəyini açıqlayıb. İyun ayında 2 həftə vaxt verdiyini desə də, cəmi 48 saatdan sonra Ağ Ev lideri İrana hücum əmrini verib.