İsrael Katzdan sərt xəbərdarlıq | "Vurmadığımız hədəflər daha sərt vurulacaq" - Baku TV

“Hazırda İranla əlaqəli ticarət gəmilərinin blokadası üzrə əməliyyat tapşırıqlarını yeddi ABŞ döyüş gəmisi yerinə yetirir”.

Bu barədə Pentaqonda keçirilən mətbuat konfransında ABŞ Birləşmiş Qərargah Rəisləri Komitəsinin rəhbəri Den Keyn bildirib.

Onun sözlərinə görə, hərbçilər Oman körfəzində, Hörmüz boğazından şərqdə, Oman və İran sahilləri arasındakı xətdə yerləşir. General vurğulayıb ki, ABŞ Hərbi Dəniz Qüvvələri blokada başlayandan bəri İran limanlarından çıxan 13 gəminin qarşısını artıq alıb.

"Məcburi tədbirlər İranın ərazi sularında və beynəlxalq sularda həyata keçirilməyə davam edəcək", – deyə Keyn əlavə edib.

Bu arada, İsrailin müdafiə naziri İsrael Katz İranın tarixi yolayrıcında olduğunu diqqətə çatdırıb. O, Tehranın hazırkı siyasəti davam edəcəyi təqdirdə yeni zərbələrin endiriləcəyi barədə xəbərdarlıq edib.

Katzın fikrincə, hazırda İran tarixi seçim qarşısındadır və buna görə də gələcəyi ilə bağlı düzgün qərar qəbul etməlidir.

O həmçinin qeyd edib ki, İsrail tərəfindən hələ vurulmayan hədəflər ABŞ və İsrailin birgə əməliyyatı zamanı artıq zərbələrə məruz qalanlardan daha sərt olacaq.