İsrail bu əraziləri nəzarətdə saxlamaq istəyir | Netanyahudan aranı qarışdıracaq çıxış

İsrail Hərbi Hava Qüvvələrinə məxsus təyyarələr Suriyanın paytaxtı Dəməşqin ətraf ərazilərinə silsilə zərbələr endirib.

Məlumata görə, Radioelektron Mübarizə İdarəsi və Suriya Silahlı Qüvvələrinin helikopterlərinin yerləşdiyi hərbi aerodrom atəşə tutulub. Hər iki obyekt Suriya paytaxtının cənub-şərqindəki Əqraba bölgəsində yerləşir.

Bu arada, İsrail Qolan təpələrinə nəzarəti əbədi olaraq əlində saxlamaq niyyətindədir. Bunu İsrailin Baş naziri Benyamin Netanyahu deyib.

“Qolan təpələri üzərində nəzarətimiz və hakimiyyətimiz təhlükəsizliyimizi təmin edir. Qolan təpələri həmişə İsrailin bir hissəsi olacaq”, – deyə B.Netanyahu vurğulayıb.

BMT Baş katibinin rəsmi nümayəndəsi Stefan Düjarrik isə bəyan edib ki, təşkilatın müşahidəçi qüvvəsi Qolan təpələrində öz mövqelərində qalmağa davam edir.

“Vəziyyət sakit olaraq qalır və təşkilatın əməkdaşları öz mandatlarını yerinə yetirərək vəzifələrində qalırlar”, – deyə BMT rəsmisi bildirib.