İsrail məqsədlərinə çatana qədər... | Netanyahu həbs edilməsi barədə qərara səssiz qalmadı

Beynəlxalq Cinayət Məhkəməsinin həbsinə order verdiyi İsrailin Baş naziri Benyamin Netanyahu məsələyə münasibət bildirib.

“Biz bütün məqsədlərimizə çatana qədər təzyiqlərə boyun əyməyəcəyik və geri addım atmayacağıq”, – deyə B.Netanyahu bildirib.

Qeyd edək ki, Beynəlxalq Cinayət Məhkəməsi İsrailin Baş naziri və sabiq müdafiə naziri Yoav Qalantın həbsinə order verib.

Bu arada, Avropa İttifaqının Ali Nümayəndəsi Cozef Borrel Beynəlxalq Cinayət Məhkəməsinin qərarını dəstəkləyir. Borrel sözügedən şəxslərin həbsi ilə bağlı qərarın hörmət edilməli və icra edilməli olduğunu bildirib.

Qərarın siyasi olmadığını vurğulayan Borrel bütün Avropa İttifaqı ölkələri daxil olmaqla məhkəməyə üzv dövlətləri qərarı icra etməyə çağırıb.

Yeri gəlmişkən, Böyük Britaniyanın Leyboristlər hökuməti İsrailin Baş naziri və keçmiş müdafiə naziri ölkəyə gəlsələr, onların həbsinə order verən Beynəlxalq Cinayət Məhkəməsinin qərarını yerinə yetirməyə hazırdır. Bu barədə Baş nazir Kir Starmerin ofisinin nümayəndəsi məlumat verib.

Qeyd olunub ki, Böyük Britaniya hökuməti qanuni öhdəliklərinə əməl edəcək.

ABŞ Prezidenti Co Bayden isə Beynəlxalq Cinayət Məhkəməsinin İsrailin Baş naziri və sabiq müdafiə nazirinin həbsinə order verməsini yersiz hesab edir. O həmçinin vurğulayıb ki, ABŞ öz təhlükəsizliyinə təhdidlər qarşısında həmişə İsrailin yanında olacaq.