İsrail qoşunları Qəzzanın dərinliklərinə irəliləyir | Həlledici mərhələ başladı

Mayın 18-də İsrailin Qəzza zolağına endirdiyi zərbələr nəticəsində azı 151 nəfər həlak olub.

Bu barədə “Al Jazeera” telekanalı məlumat yayıb.

Bildirilir ki, onlardan 70-i Qəzza şəhərinin və Fələstinin şimal ərazilərinin bombalanması nəticəsində həlak olub.

İsrailin Baş nazirinin ofisinin müşaviri Dmitri Qendelman mayın 18-də bildirib ki, ölkənin Müdafiə Ordusu Qəzza zolağında radikal HƏMAS hərəkatını məğlub etmək üçün “Gideonun arabaları” əməliyyatının həlledici mərhələsinə başlayıb.

“Quru qoşunları Qəzza zolağının dərinliklərinə doğru irəliləyir, HƏMAS strukturlarına dəqiq zərbələr endirir və əsas mövqeləri tutur. Son bir həftə ərzində aviasiya yüzlərlə hədəfi vurub, anbarları, tunelləri, raket mövqelərini və terrorçuları məhv edib”, ‒ deyə o vurğulayıb.

Qeyd edək ki, daha əvvəl aclıq təhlükəsinin qarşısını almaq üçün İsrailin Qəzza zolağına ərzaq tədarükünə icazə verəcəyi bildirilib.