İsrail və Livan arasında gərginlik davam edir | ABŞ narahatdır

Livan sərhədində “Hizbullah” hərbi qruplaşması ilə İsrail qüvvələri arasında qarşıdurma davam edir.

Yerli mətbuatın məlumatına görə, İsrail Livanla sərhədə tanklar və zirehli texnika yerləşdirib, regiona əlavə qüvvələr də cəlb olunub. “Hizbullah” isə hərbi əməliyyatları gücləndirməyə davam edir.

Qeyd edək ki, İsrailin Yuxarı Qalileyanın sərhəd bölgələrinə texnika yerləşdirməsi tərəflər arasında hərbi əməliyyatların intensivliyinin artması ilə əlaqələndirilir.

ABŞ isə İsrailin Livana müharibə elan etmək ehtimalından narahatlığını bildirib.

“Mən mediada yayılan informasiyaları şərh edə bilmərəm. Lakin vurğulamaq istəyirəm ki, biz İsrail-Livan sərhədində baş verən hücumlarla bağlı narahatlıqlara son qoymağın yeganə yolunun diplomatik yol olduğuna inanırıq. İsrail hökuməti diplomatik yolla həllin tərəfdarı olduğunu bildirib. Biz regionda bu məsələni izləməyə davam edəcəyik”, – ABŞ Dövlət Departamentinin sözçüsü Metyu Miller bildirib.

Qeyd edək ki, İsraillə HƏMAS arasında münaqişə başlayan gündən “Hizbullah” hərbi qruplaşmaya dəstək olmaq məqsədilə Livanın cənub sərhədi boyunca İsrail Ordusu ilə mübarizə aparır. Hücumlar nəticəsində İsrail tərəfindən 6 mülki şəxs, 10 əsgər, Livan tərəfindən isə 286 nəfər həlak olub.