İsrail Yəmənə hücum etdi | Ölənlər var

İsrail Hərbi Hava Qüvvələri Yəmənin Hudeyda limanı yaxınlığındakı hərbi obyektlərə zərbələr endirib.

Məlumata görə bu, İsrailin Yəməndəki hərbi obyektləri ilk dəfə bombalamasıdır.

Hava hücumunda “F-35” qırıcıları da daxil olmaqla, İsrail Hərbi Hava Qüvvələrinə məxsus ən azı 12 təyyarə iştirak edib. Belə ki, Hudeyda limanında neft anbarları, şəhərin elektrik stansiyası, eləcə də hərbi polis binası bombalanıb. Nəticədə 3 nəfər ölüb, 15 nəfər xəsarət alıb.

İsrailin Baş naziri Benyamin Netanyahu bildirib ki, ölkəsi lazım olan hər vasitə ilə özünü müdafiə etməkdə qərarlıdır.

“Bizə hücum edən hər kəs hərəkətlərinin əvəzini ağır ödəyəcək. Sabit və təhlükəsiz Yaxın Şərqi görmək istəyən hər kəs istər Yəməndə, istər Qəzzada, istərsə də Livanda İsrailin İrana və onun müvəkkillərinə qarşı mübarizəsini dəstəkləməlidir”, – deyə Baş nazir bildirib.

B.Netanyahu qeyd edib ki, iyulun 20-də səhər hərbi-siyasi kabineti toplayıb və nazirlərdən Yəməndə husilərin hədəflərinə hücum qərarını dəstəkləmələrini istəyib.

“Bizim hücum etdiyimiz liman mülki liman deyil, İran tərəfindən husilərə verilən silahların giriş nöqtəsi kimi hərbi məqsədlər üçün istifadə edilib. Husilər bu silahlardan İsrailə, region ölkələrinə və beynəlxalq dəniz yollarına hücum etmək üçün istifadə ediblər”, – deyə Baş nazir əlavə edib.