İsraildə daxili gərginlik pik həddə çatdı | Netanyahu istefa verir?

Aprelin 7-də İsraildə minlərlə insan etiraz aksiyası keçirib.

İştirakçılar Baş nazir Benyamin Netanyahunun istefasını və 6 ay əvvəl İsrail ərazisinə hücum zamanı HƏMAS qruplaşmasının əsir götürdüyü girovların azad edilməsini tələb ediblər.

Yerli medianın məlumatına görə, paytaxt Təl-Əvivdə və ölkənin digər şəhərlərində nümayişlər İsrail hərbçilərinin girovlardan birinin cəsədinin qaytarıldığını açıqlamasından sonra başlayıb. Küçələrə çıxan sakinlər hesab edirlər ki, Netanyahu hökuməti Qəzzada hələ də HƏMAS-ın saxladığı 130-a yaxın girovu azad etmək iqtidarında deyil.

Etirazlarda iştirak edənlər arasında girovların yaxınları da olub. Cəsədi qaytarılan əsirin bacısı şəxsi sosial media hesabında bildirib ki, əgər İsrail hakimiyyəti atəşkəsə razılaşsaydı, qardaşı evə sağ qayıda bilərdi.

“Liderlərimiz qorxaqdır və siyasi mülahizələrlə idarə olunur. Buna görə də heç bir razılaşma yoxdur. Baş nazir, Hərbi Nazirlər Kabineti və koalisiya üzvləri! Güzgüdə özünüzə baxın və mənə deyin ki, əlləriniz qana bulanmayıb”, – o paylaşımında qeyd edib.

Təşkilatçıların məlumatına görə, etirazlarda 100 minə yaxın, digər mənbələrə görə isə iştirakçıların sayı 45 minə yaxın olub.

Yeri gəlmişkən onu da qeyd edək ki, Təl-Əvivdə nümayiş zamanı avtomobil izdihamın üzərinə çırpılıb, nəticədə 5 nəfər yaralanıb, sürücü isə həbs edilib. Bəzi hallarda nümayişlər polislə toqquşmalarla müşayiət olunub.