İsraildən qalmaqal yaradacaq açıqlama | ABŞ silah tədarükünü dayandırıb?

İsrailin Baş naziri Benyamin Netanyahu çıxışı zamanı növbəti dəfə ABŞ-ni günahlandırıb.

O, açıqlamasında Ağ Evin Təl-Əvivə silah vermədiyini iddia edib.

Hökumət rəhbəri hətta bu prosesin son bir neçə aydır ki, gecikdirildiyini də deyib:

“ABŞ-nin Dövlət katibi Entoni Blinken bu yaxınlarda İsraildə olarkən biz həmsöhbət olduq. Mən bildirdim ki, müharibə başlayan andan bəri Vaşinqtonun Təl-Əvivə verdiyi dəstəyi yüksək qiymətləndirirəm. Amma mən bir məqamı da vurğuladım ki, son bir neçə aydır ki, ABŞ ən yaxın müttəfiqi olan İsrailə silah və sursat vermir.

E.Blinken məni əmin etdi ki, bu problem ortadan qalxacaq. Ümid edirəm ki, bu belə olar. 2-ci Dünya müharibəsi zamanı Çörçil ABŞ-yə demişdi ki, texnikanı verin, biz işimizi yerinə yetirəcəyik. Mən də deyirəm ki, siz bizə silah-sursat verin, biz də işimizi daha sürətli şəkildə həll edək".

B.Netanyahunun açıqlamasına rəsmi Vaşinqtondan reaksiya gecikməyib. Ağ Ev İsrailin Baş nazirinin “ABŞ İsrailə silah-sursat vermir” iddiasını təkzib edib.

“Onu deyim ki, biz B.Netanyahunun nə barədə danışdığını həqiqətən də bilmirik. Çünki silah-sursatların gecikməsi halı yalnız bir dəfə baş verib və biz həmin məsələ ilə bağlı dəfələrlə açıqlama vermişik.

Bundan əlavə olaraq isə belə bir hal yaşanmayıb. Dövlət katibi E.Blinkenin də dediyi kimi, hər şey öz axarı ilə davam edir və hərbi texnikanın tədarükündə gecikdirilmə kimi proses baş tutmayıb”, – Ağ Evin mətbuat katibi Karin Jan-Pyer deyib.

Məlumat üçün bildirək ki, ABŞ-nin Dövlət katibi Entoni Blinken də NATO-nun Baş katibi Yens Stoltenberqlə keçirdiyi mətbuat konfransında Ağ Evin İsrailə silah tədarükünü dayandırmadığını deyib.

Onun sözlərinə görə, Təl-Əvivə yalnız güclü bombaların bir partiyasının ötürülməsi gecikdirilib. Bunun da səbəbi sözügedən sursatların Rəfah kimi əhalinin sıx məskunlaşdığı bir ərazidə istifadəsi ilə bağlı Ağ Evin keçirdiyi narahatlıqdır.