İsraili dəstəkləyənlərin Ağ Evdən uzaqlaşma səbəbləri | Trampın "U" dönüşü

ABŞ Prezidenti Donald Tramp İran və Qəzza mövzusunda İsrailin Baş naziri Benyamin Netanyahu ilə fikir ayrılığı yaşayır.

Bu səbəbdən ABŞ administrasiyasında çalışan və açıq şəkildə İsraili dəstəkləyən 3 nəfər vəzifədən uzaqlaşdırılıb. Məlumatı İsrailin nüfuzlu “Yedioth Ahronoth” qəzeti yayıb.

Baş verən hadisələr onu göstərir ki, Donald Tramp İsrailə qarşı sərt ritorika sərgiləməyə başlayıb. İran və Qəzza məsələsində fikir ayrılığı köhnə əməkdaşlığı davam etdirmək üçün ciddi problem yaradır. Netenyahu hökuməti ABŞ-dən hər iki məsələdə maksimum dərəcədə öz mövqeyinin müdafiəsini tələb edir.

Tramp 3 yüksəkrütbəli əməkdaşı vəzifədən uzaqlaşdırmaqla birtərəfli siyasət aparmayacağına eyham vurub. Bu, 3 amillə bağlıdır. Birincisi, Tramp seçkilərdə demokratlar qarşısında gücünü artırmaq üçün ABŞ-nin müsəlman icması və müharibə əleyhdarlarına bir neçə vəd verib.

Ağ Ev rəhbəri növbəti seçkidə varisinin qələbəsini təmin etmək məqsədilə verdiyi sözləri tutmalıdır. İkinci məsələ İranla gərginliyi azaltmaq və Qəzzada barışığa nail olmaqdır. Bu isə İsrailin mövqeyi ilə üst-üstə düşmür.

Rəsmi Təl-Əviv İrana qarşı hərbi əməliyyatların həyata keçirilməsi və onun Yaxın Şərqdəki proksilərinin tamamilə məhv edilməsini istəyir. Husilərlə əldə edilən razılaşma isə onu göstərir ki, ABŞ-nin müharibə aparmaq niyyəti yoxdur. İsrail isə bundan narahatdır. Məsələni öz xeyrinə dəyişmək üçün İsrail Qəzzaya hücumları artıra, eyni zamanda İranla gərginliyi pik həddə çatdıra bilər.

ABŞ-də olan yəhudi lobbisi vasitəsilə Respublikaçılar Partiyasının daxilində Trampa qarşı münasibətin gərginləşdirilməsi də mümkün variantlardandır.