İsrailin Baş nazirindən Suriyadakı hadisələrlə bağlı vacib açıqlama | Yaxın Şərq üçün tarixi gündür

“Bu, Yaxın Şərq üçün tarixi bir gündür. Əsəd rejiminin süqutu böyük imkanlar təqdim etməklə yanaşı, həm də ciddi təhlükələrlə doludur. Bu süqut bizim “Hizbullah”a və İrana, Əsədə qarşı mövqeyimizin birbaşa nəticəsidir”.

Bu sözləri İsrailin Baş naziri Benyamin Netanyahu Suriyada baş verən hadisələrlə bağlı açıqlamasında deyib.

“Bu həm də o deməkdir ki, biz mümkün təhlükələrə qarşı tədbir görməliyik. Bunlardan biri də İsrail və Suriya arasında 1974-cü ildə imzalanmış Qüvvələrin Ayrılması Sazişinin qüvvədən düşməsidir. Bu müqavilə 50 il davam etdi. Dünən gecə o, qüvvədən düşdü. Suriya Ordusu mövqelərini tərk etdi. Biz heç bir düşmən qüvvənin İsrailin sərhədi yaxınlığında yerləşdirilməməsi üçün ordumuza bu mövqeləri ələ keçirmə əmri verdik. İsrail qüvvələrinin bufer zonada yerləşdirilməsi müvəqqəti tədbirdir.

Biz kürdlərə, xristianlara və İsraillə sülh içində yaşamaq istəyən müsəlmanlara əlimizi uzadırıq. Hadisələri izləyəcəyik. Suriyada ortaya çıxan yeni qüvvələrlə qonşuluq və sülh münasibətləri qurmaq istəyirik. Lakin biz həm də İsrail dövlətini təhlükələrdən qorumaq üçün əlimizdən gələni edəcəyik”, – o əlavə edib.