Kennedinin əsl qatilini göstərən sənədlər gizlədilib? | Jurnalistdən gözlənilməz açıqlama

ABŞ Prezidenti Donald Trampın Amerikanın 35-ci lideri Con Kennedinin ölümünün müəmmalı halları ilə bağlı arxivlərin məxfilikdən çıxarılması ilə bağlı verdiyi sərəncam sui-qəsd nəzəriyyəsi pərəstişkarları arasında böyük səs-küyə səbəb olub.

Əvvəllər C.Kennedinin qətlinin “Amerika hökumət dairələri” tərəfindən sifariş edildiyi versiyasının tərəfdarlarından biri olan amerikalı jurnalist Cerald Pozner indi rəsmi iddianı dəstəkləyir: qatil Li Harvi Osvalddır. Lakin o, hələ də məsələnin qaranlıq tərəfinə aydınlıq gəlmədiyini bildirib:

“Mərkəzi Kəşfiyyat İdarəsinin Li Harvi Osvaldı izlədiyinə dair sənədlər dərc olundu. Onlarla tanış olduqdan sonra MKİ-dən soruşmaq istəyirəm: siz Li Harvinin təhlükəli və qeyri-adekvat olduğunu bilirdinizmi? Əgər bu adamın barıt çəlləyi olduğunu bilirdinizsə, niyə bu barədə FTB-yə məlumat vermədiniz?”.

Sui-qəsd nəzəriyyəçiləri isə başqa düşüncədədirlər. Onların fikrincə, əsl qatili göstərən sənədlər gizlədilib və ya yandırılıb.

CNN telekanalı iddia edir ki, 2017-ci ildən bəri səlahiyyətlilər C.Kennedinin qətli ilə bağlı 70 mindən çox sənədin məxfiliyini ləğv edib.

Xatırladaq ki, Con Kennedi 22 noyabr 1963-cü ildə Dallasda silahlı Li Harvi Osvald tərəfindən öldürülüb.