Maduro devrildi, spiker Pezeşkianı hədəf göstərdi

“İranlılar illərdir teokratik rejimin reallığı təhrif etmək strategiyasını yaxşı tanıyırlar, artıq xalq buna aldanmır”.

Bu barədə İtaliyanın “Corriere della Sera” nəşri İranda davam edən etiraz aksiyaları barədə təhlilində bildirib.

“Bu səbəbdən polis qüvvələrinin komandanı Əhməd Rza Radan “son iki gecə ərzində xalqı təhrik edən liderlərin məqsədyönlü həbsinə başlanılıb” deyəndə heç kim təəccüblənmir”, – nəşr yazıb.

Təhlildə qeyd edilib ki, İran küçələrində xalqın cəsarətli yürüşləri davam edərkən diqqət ABŞ Prezidenti Donald Trampın Venesuela diktatoru Nikolas Maduronu həbs etdirməsinə fokuslanıb:

“İran daxili və xaricində sual yaranır: Tramp İslam Respublikası rəhbərlərinə qarşı oxşar əməliyyat düşünürmü? Xüsusilə bu, bir neçə saat əvvəl “Delta” Xüsusi Təyinatlı Qüvvələrinin helikopterlərlə Karakasa enişindən əvvəl edilən hədələrdən sonra aktualdır. İsraillə 12 günlük müharibədə olduğu kimi, bəziləri belə bir müdaxilənin olmasını arzulayır, digərləri isə yalnız daxili inqilabın diktaturanı devrə biləcəyinə inanır.

Küçə və meydanlar insanlarla dolarkən İslam Respublikasının hakimiyyət piramidası etirazları əngəlləmək üçün vədlərlə çıxış edir: əlavə pul çap etmək, qiymət artımının qarşısını almaq və bir-iki naziri qurban vermək. Parlamentin radikal sədri Məhəmməd Baqir Qalibaf isə ölkədəki iqtisadi fəlakəti islahatçı Prezident Məsud Pezeşkianın yumşaqlığının nəticəsi hesab edir. Məsud Pezeşkian isə cavab olaraq radikalları ABŞ ilə nüvə danışıqlarını pozmaqda və sanksiyaların əsas səbəbi olmaqda günahlandırıb”.