Moskvadakı terrordan sensasiyalı xəbər | ABŞ təcili xəbərdarlıq etdi

Rusiyanın paytaxtı Moskvada baş verən terrorun potensial icraçıları barədə bir sıra iddialar ortaya atılıb.

Terror üzrə ekspert Peter Noyman hesab edir ki, hadisəni törədənlərin dəst-xəti və ABŞ-dən gələn xəbərdarlıqlar bu məsələdə İŞİD-in əli olduğunu deməyə əsas verir.

Onun sözünə qüvvət olaraq, araşdırmaçı jurnalist Xristo Qrozev vurğulayıb ki, təxminən iki həftə əvvəl ABŞ tərəfi Kremlə bununla bağlı xəbərdarlıq edib. Bundan sonra isə Rusiyada İŞİD-lə əlaqəsi olan bir qrup şəxs həbs edilib.

"Burada bir maraqlı məqam da var. Xarici KİV bir ildir yazır ki, Əfqanıstandan Rusiyaya gətirilən gənclərə Rusiya Baş Kəşfiyyat İdarəsi tərəfindən təlim keçirilir. Belə bir terror aktında Rusiyanın izinin olub-olmaması sualı açıq qalır”, – deyə o qeyd edib.

Daha bir ekspert Kolin Klark da sözügedən məsələdə “Vilayəti Xorasan” terror təşkilatının izinin olduğunu iddia edib.

"Vilayəti Xorasan" son iki ildə Rusiyaya fokuslanıb və tez-tez Putini tənqid edir. İŞİD-in bu qolu Rusiyanın Əfqanıstan, Çeçenistan və Suriyaya müdaxiləsinə eyham vuraraq Kremli əlini müsəlmanların qanına batırmaqda ittiham edirdi”, – deyə o əlavə edib.

Bundan əlavə, ABŞ mediasında da “Krokus Siti” terrorunun İŞİD tərəfindən törədilməsinə dair informasiyalar yer alıb. Məlumatda ABŞ-nin İŞİD-in Əfqanıstanda yerləşən "Vilayəti Xorasan" adlı qolunun Moskvaya hücum planlaşdırdığına dair kəşfiyyat məlumatlarını topladığı və bunu qarşı tərəflə bölüşdüyü qeyd olunub.