Müharibə davam edir | Ramazan ayında Qəzzada atəşkəsə ümid yoxdur

HƏMAS hərbi qruplaşması ilə İsrail arasında gedən müharibənin artıq 157-ci günüdür.

Münaqişə 6-cı ayına qədəm qoysa da, uzunmüddətli atəşkəs hələ də üfüqdə görünmür.

ABŞ Prezidenti Cozef Baydenin Qəzza zolağında atəşkəs razılaşmasının martın 4-nə qədər əldə olunacağını deməsinin üstündən isə artıq bir həftə keçib. Lakin hələ də atəşkəsdən əsər-əlamət yoxdur.

Hərbi qruplaşmanın siyasi lideri İsmayıl Haniyə isə atəşkəsin imzalanmamasına əsas səbəb kimi rəsmi Təl-Əvivi göstərib:

"Biz səy göstərdiyimiz razılaşmaya nail olmaq üçün beş prinsip yaratmışıq ki, bu da hərtərəfli atəşkəs və Qəzzada müharibəyə son qoyulması, İsrail Ordusunun regiondan tamamilə çıxarılması və girovların şərtsiz şəkildə geri qaytarılmasını əhatə edir. Daha sonra isə Qəzzanın bərpası və qaçqınların humanitar yardım, sığınacaqlarla təmin edilməsi, blokadaya son qoyulması kimi məsələlərin həlli nəzərdə tutulub. 5-ci şərtimiz isə girov mübadiləsində razılığa gəlməkdir".

İsrailin Baş naziri Benyamin Netanyahu isə əsir və girovların azad edilməsinə dair aparılan danışıqların effektiv nəticə vermədiyini bildirib:

"Bir sıra ərəb ölkələrinin liderləri Qəzza zolağında əməliyyatın davam etdirilməsinə səssiz qalaraq münaqişənin davam etməsi üçün razılıq verirlər. Biz bütün girovların azad edilməsini tələb edirik. Əgər bu baş verməsə, İsrail Ordusu Qəzzada əməliyyatlarını dayandırmayacaq. Zənnimcə, İsrail Müdafiə Qüvvələrinin Qəzza zolağında keçirdiyi əməliyyat yaxın iki ay ərzində başa çata bilər. Biz döyüş batalyonlarının dörddə üçünü məhv etmişik. Döyüşlərdə isə demək olar ki, sona yaxınlaşırıq və bu iki aydan çox çəkməyəcək. Bəlkə altı həftə, bəlkə də dörd həftə davam edəcək".