Müxalifət qüvvələri durmadan irəliləyir | Türkiyə XİN-dən Suriyadakı gərginliyə reaksiya

Suriyada Bəşər Əsəd hökumətinə qarşı çıxan müxalifət qüvvələri Hələbin mərkəzinə daxil olub.

“Hələb və İdlib əyalətlərində üç gün davam edən döyüşlərdən sonra müxalif qruplar 400 kvadratkilometr əraziyə nəzarəti ələ keçirib”, – deyə məlumatda bildirilib.

İdlib və ona bitişik bölgədə sülhün qorunması Türkiyə üçün prioritet məsələdir.

Bu barədə Türkiyə Xarici İşlər Nazirliyinin sözçüsü Ömcü Keçelinin İdlib və ona bitişik bölgədəki hadisələrlə bağlı suala cavabında deyilir.

Qeyd olunub ki, 2017-ci ildən bəri İdlibdə gərginliyin azaldılması ilə bağlı bəzi razılaşmalar əldə olunub və Türkiyə tərəf olduğu müqavilələrin tələblərini dəqiqliklə yerinə yetirir.

“İdlibə qarşı son hücumların Astana razılaşmalarının ruhuna və fəaliyyətinə xələl gətirəcək, ciddi mülki itkilərə səbəb olacaq səviyyəyə çatdığına dair müxtəlif beynəlxalq platformalarda lazımi xəbərdarlıqlar etdik və bu hücumların dayandırılmasının vacibliyini qeyd etdik.

Əslində, son günlər baş verən qarşıdurmalar regionda gərginliyin arzuolunmaz şəkildə artmasına səbəb olub. Yeni və daha böyük qeyri-sabitliyin yaranmaması və mülki əhalinin zərər görməməsi Türkiyə üçün böyük əhəmiyyət kəsb edir”, – deyə Xarici İşlər Nazirliyinin sözçüsü vurğulayıb.