NATO və Macarıstan Ukrayna barədə razılaşdı | Orbandan vacib açıqlama

Macarıstanın Baş naziri Viktor Orban NATO-nun baş katib Yens Stoltenberqlə görüşüb.

Onlar Ukraynaya yardım məsələsini müzakirə ediblər. Macarıstan açıq şəkildə Kiyevə yardımdan imtina etdiyini bildirib.

“Müzakirəmizin mühüm mövzusu Rusiya-Ukrayna müharibəsi olub. Məlumdur ki, Macarıstanın mövqeyi NATO-ya üzv ölkələrin əksəriyyətindən fərqlidir. Bu müharibə vəziyyətindən sülhə keçmək məsələsinə biz fərqli cavablar veririk. Biz nə bu müharibəyə döyüşmək üçün adam göndərəcəyik, nə də ölkəmizin ərazisi münaqişənin ocağına çevriləcək. Biz bu günə qədər vacib saydığımız bütün addımları atmışıq. İndi də ölkəmizin mövqeyini aydın şəkildə ifadə etməyə və NATO-nun baş katibi ilə sözügedən məsələdə razılıq əldə etməyə nail olduq”, – deyə V.Orban qeyd edib.

Y.Stoltenberq V.Orbanın bu məsələdə mövqeyini qəbul etdiyini vurğulayıb.

“Mən şadam ki, biz bu məsələ ilə bağlı ortaq razılığa gəldik. Macarıstan maliyyə baxımından Kiyevin yanında olmayacaq. Bundan əlavə, heç bir macarıstanlı əməkdaş Ukrayna ilə bağlı fəaliyyətimizdə iştirak etməyəcək. Eyni zamanda Baş nazir məni əmin etdi ki, Macarıstan bu səylərə qarşı çıxmayacaq və digər müttəfiqlərin iştirakına mane olmayacaq. Təşkilata üzv ölkələr alyansın bütün səylərində yaxından iştirak etməlidir deyə bir öhdəliyimiz yoxdur”, – NATO-nun baş katibi deyib.