Navalnı ölümündən 16 gün sonra dəfn edildi

Rusiyalı müxalifətçi Aleksey Navalnı ilə vida mərasimi keçirilib. Bu barədə yerli media məlumat verib.

Bildirilib ki, 47 yaşlı siyasətçi ilə vidalaşma paytaxt Moskvada yerləşən Marino kilsəsində baş tutub.

Xəbərə görə, ibadət yerinin qarşısına toplaşanlar onu alqışlarla son mənzilə yola salıblar. Aleksey Navalnı ölümündən 16 gün sonra Borisov qəbiristanlığında dəfn edilib. Bildirilib ki, hazırda məzarlıq polis tərəfindən qorunur, ətraf ərazilər isə barikadalarla əhatə olunub. Hüquq-mühafizə orqanları yaxın bir neçə gün ərzində sözügedən ərazidə xidməti fəaliyyətini davam etdirəcək.

Vidalaşmağa gələnlər arasında ABŞ-nin Rusiyadakı səfiri Linn Treysi, Almaniya səfiri Aleksandr Qraf Lambsdorf, Fransa səfiri Pyer Levi və bir sıra digər Avropa İttifaqı ölkələrinin diplomatik nümayəndələri də var.

Siyasi şərhçi kimi tanınan Kira Yarmışın sosial şəbəkədə yayımladığı videodan da aydın görmək olur ki, cənazə maşını gedəndən dərhal sonra insanlar metal baryerləri aşaraq əllərində çiçəklərlə yolun piyada hissəsinə çıxıblar.

Qeyd olunub ki, məbəddən qəbiristanlığa qədər iki kilometrə yaxın yol insan izdihamı ilə dolu olduğundan həmin istiqamətdə avtomobillərin hərəkəti məhdudlaşdırılıb.

Xatırladaq ki, müxalif siyasətçi Aleksey Navalnı fevralın 16-da Rusiyanın Yamalo-Nenets Muxtar Dairəsinin Karp qəsəbəsindəki cəzaçəkmə koloniyasında ürək tutmasından vəfat edib.