Netanyahu güzəştə getmədi | Sülh üçün şərt qoydu

İsrail Silahlı Qüvvələri Qəzzaya ardıcıl 6 raket zərbəsi endirib. Bu barədə yerli mediada məlumat yayılıb.

Xəbərdə bildirilib ki, aviazərbələr nəticəsində azı 5 nəfər həlak olub, bir neçə nəfər yaralanıb.

Xatırladaq ki, İsrail və HƏMAS arasında müharibə 2023-cü il oktyabr 7-də başlayıb. Ən son məlumatlara görə, Qəzzada 40 405 nəfər həyatını itirib.

Bu arada, “Reuters” informasiya agentliyi atəşkəs danışıqları ilə bağlı sensasiyalı yazı dərc edib. Xəbərdə qeyd olunub ki, İsrailin Baş naziri Benyamin Netanyahu Qəzzada atəşkəs və girovların azad edilməsi üçün danışıqlar aparan İsrail nümayəndə heyətinin üzvləri ilə mübahisə edib.

Bildirilib ki, B.Netanyahu SAXAL-ın Fələstin anklavını Misirdən ayıran Filadelfiya dəhlizinə nəzarəti məsələsində güzəştə getməkdən imtina edib, nümayəndə heyətinin üzvləri isə öz növbəsində mövqeyin yumşaldılmasını xahiş ediblər.

Xəbərə görə, Baş nazir İsrail Ordusunun mövqelərindən birinin bir neçə yüz metr yerdəyişməsinə razılıq versə də, uzunluğu 14 kilometrə yaxın olan sahədə nəzarəti saxlamaqda israrlıdır.

B.Netanyahu danışıqlar aparan İsrail nümayəndə heyətinin bəzi üzvlərinin təzyiqlərinə baxmayaraq, bu şərtlərin saxlanılmasını tələb edib.