Netanyahu ilə görüşdən sonra ABŞ-dən sərt mesaj

İsrailin Qəzzaya hücumları davam edir.

Zərbələr nəticəsində azı 30 yaşayış binası məhv edilib. Təkcə Qəzza şəhərində azı 16 nəfərin öldüyü bildirilir. Onlarla insan evini tərk etmək məcburiyyətində qalıb.

Bütün bunların fonunda, ABŞ dövlət katibi Marko Rubio sülh danışıqları üçün İsrailə səfər edib.

“HƏMAS hərəkatı artıq sülh və sabitliyi təhdid edən bir müqavimət kimi mövcud ola bilməz”, ‒ deyən Rubio bildirib ki, Qəzza zolağında müharibə 7 oktyabr 2023-cü ildə İsrailə hücum edənlərin məhv edilməsi və girovların azad edilməsi ilə bitməlidir.

O bu barədə İsrailin Baş naziri Benyamin Netanyahu ilə mətbuat konfransında çıxışı zamanı vurğulayıb.

Bəs bu açıqlamanın fonunda, Qəzzada nələr baş verir?

İki ilə yaxındır davam edən müharibə nəticəsində regionda 64 mindən çox insan həlak olub.

Yaralıların sayı 164 min nəfəri keçib. Son sutka ərzində isə Qəzzaya hücumlar azı 68 nəfərin ölümü, 346 fələstinlinin yaralanması ilə nəticələnib.

Bundan əlavə, İsrail tərəfi humanitar yardım gözləyən şəxsləri də hədəfə almağa davam edir. Yardım məntəqələrinə hücumlar 10 nəfərin ölümü, daha 8 fələstinlinin yaralanmasına səbəb olub.