Netanyahu orduya təcili tapşırıq verəcək | Etirazın əsas səbəbləri nələrdir?

Bazar günündən etibarən İordan çayının Qərb sahilində yerləşən şəhər və qəsəbələrdə minlərlə fələstinli aksiya keçirərək beynəlxalq ictimaiyyəti Qəzza zolağında müharibənin və aclığın dayandırılması üçün dərhal hərəkətə keçməyə çağırıb.

Əsir və keçmiş məhbusların məsələlərini araşdıran Ali Komitənin sədri Amin Şoman bildirib ki, dünya Fələstin xalqı üçün ədalət təmin edənə qədər dinc nümayişləri davam etdirəcək.

“Bu nümayişlər Qəzza zolağında yaşayan iki milyon insana qarşı davam edən müharibəyə, aclıq siyasətinə, İsrail həbsxanalarında əsirlərə qarşı baş verən pozuntulara və edamlara, Qərb sahilində davam edən məskunlaşma siyasətinə, həmçinin Cenin və Tulkərm düşərgələrində olduğu kimi düşərgələrin dağıdılması və sakinlərin məcburi köçkün salınmasına qarşı etirazı ifadə edir”, ‒ o əlavə edib.

Aksiya iştirakçıları “Dünya ölkələrinin sükutuna son!”, “İslam və Ərəb dünyasının susqunluğuna son!” kimi şüarlar səsləndiriblər.

Bu arada, İsrailin Baş naziri Benyamin Netanyahu Qəzza ilə bağlı atılacaq sonrakı addımları müəyyənləşdirmək üçün şənbə günü Nazirlər Kabinetinin iclasını keçirəcək. Bu barədə o, özü açıqlama verib.

Bildirib ki, toplantıda hərbi cəhətdən qarşıya qoyulan üç hədəfə nail olmağın yolları nəzərdən keçiriləcək: “Qarşı tərəfin məğlub edilməsi, girovların azadlığına nail olmaq, eləcə də Qəzzanın artıq İsrailə təhlükə yaratmasına imkan verilməməsi əsas məqsədlərimizdir. Mən orduya Qəzzada bu üç məqsədə nail olmaqla bağlı tapşırıq verəcəyəm”.