Netanyahu sənədləri ABŞ tərəfinə təhvil verdi | Atəşkəs üçün tələblər

ABŞ Administrasiyasının xüsusi nümayəndəsi Amos Hokşteynin oktyabrın 22-də Livana səfəri öncəsi Benyamin Netanyahunun ofisi Livanda atəşkəs şərtlərini əks etdirən sənədi Amerika tərəfinə təhvil verib.

Bu barədə “Axios” məlumat yayıb.

“Sənədin müəllifi B.Netanyahunun ən yaxın məsləhətçilərindən biri olan strateji işlər naziri Ron Dermerdir. Müdafiə Nazirliyinin və SAXAL-ın mövqeyi nəzərə alınmaqla hazırlanan mesaj oktyabrın 17-də A.Hokşteynə ötürülüb.

İsrailin tələblərindən biri də SAXAL-a sərhəd bölgəsində fəaliyyət azadlığının verilməsidir. Bu, “Hizbullah”ın terror infrastrukturunu yenidən qura bilməməsini təmin etmək məqsədi daşıyır. İsrail Ordusuna Livanın hava məkanında hərəkət azadlığı da verilməlidir”, – məlumatda deyilir.

Qeyd olunub ki, bu tələb sərhədin şimal tərəfinə nəzarəti Livan Ordusu və Beynəlxalq Sülhməramlı Qüvvələrə həvalə edən BMT Təhlükəsizlik Şurasının 1701 saylı qətnaməsinə ziddir.

Amerika mənbələri Livan və beynəlxalq ictimaiyyətin İsrail şərtləri ilə razılaşmaq şanslarının praktiki olaraq sıfır olduğunu bildirib:

“Bununla belə, A.Hokşteynin digər məqsədi Livan Ordusunun İsraillə sərhəddə mövcudluğunun artırılmasına nail olmaqdır”.