Netanyahudan açıqlama: İsrail əməliyyatlara nə vaxt başlayacaq?

İsrailin Baş naziri Benyamin Netanyahu Qəzza zolağına qurudan hücuma hazırlaşdığını desə də, nə vaxt baş verəcəyi barədə dəqiq məlumat verməyib.

Hökumət rəhbəri televiziya vasitəsilə xalqa müraciətində HƏMAS yaraqlı qruplaşması ilə "yerdə, yerin altında, Qəzzada və onun hüdudlarından kənarda" döyüşəcəklərini açıqlayıb.

“Biz işığın, onlar isə zülmətin oğullarıdır”, – deyə Baş nazir bildirib.

Ölkəsinin yerüstü hücuma hazırlaşdığını deyən hökumət rəhbəri nə vaxt, necə və nə qədər əsgər sayı ilə əməliyyatlara başlanacağını hələlik demək istəməyib. Həmçinin qeyd edib ki, qurudan hücumun vaxtı hərbi kabinetin yekdil qərarı ilə müəyyən ediləcək.

B.Netanyahu bu fikirləri Qəzza zolağı ilə sərhəddə İsrail hərbçilərinin genişmiqyaslı yerləşdirilməsi və ABŞ-nin bölgədə hərbi qüvvələrinin artırılması fonunda səsləndirib.

Qeyd edək ki, indi həm yerli, həm də Qərb mediasında ən çox 2 sual müzakirə olunur.

“Biz işığın, onlar isə zülmətin övladlarıdır” deyən B.Netanyahu nəyə işarə edirdi?

Kimisi bunu dünya yəhudilərindən, xüsusilə dini bağlılığı olan oliqarxlardan maddi dəstək almaq niyyəti ilə atılan bir addım olaraq dəyərləndirir. Bəziləri isə düşünürlər ki, Baş nazirin qaranlıq və işıq terminlərini işlətməsi yerüstü hücumlarda fosfor bombalarından istifadə ehtimalını ortaya çıxarır.

Bu fikrə daha çox Qərb mediası meyil edir. Hərbi ekspertlərin fikrincə, ABŞ-nin İsrailə həm hərbi, həm də özünü müdafiəsində sərgilədiyi dəstək fonunda bu ehtimal daha da önə çıxır.

Xatırladaq ki, oktyabrın 10-u və 11-i İnsan Haqları İzləmə Təşkilatı İsrailin ağ fosfor bombası kimi tanınan işıqlı raketlərlə Qəzza zolağına zərbələr endirdiyi faktını təsdiq edib.