Netanyahudan müharibəni dayandırmaq tələbi | Təl-Əvivdə aksiya

İsrailin zərbələri nəticəsində Qəzza şəhərində azı 7 nəfər ölüb, onlarla insan yaralanıb.

Xəsarətalanlar arasında uşaqlar da olub. Dağıntılara məruz qalan ərazilərdə xilasetmə işləri aparılır.

Qeyd edək ki, İsrail Qəzza zolağına tam nəzarət etmək üçün hərbi əməliyyatları davam etdirir. Məqsəd HƏMAS-ı süquta uğratmaqdır. 2023-cü ilin 7 oktyabrında HƏMAS-ın İsrailə hücumu nəticəsində 1200 nəfər ölüb, 250 israilli girov götürülüb. Həmin tarixdən İsrailin Qəzza zolağında apardığı hərbi əməliyyatlar nəticəsində isə 63 min fələstinli həlak olub.

Təl-Əviv şəhərində HƏMAS-ın girov götürdüyü israillilərin azad olunması üçün aksiya keçirilib. İsraillilər ABŞ Prezidenti Donald Trampı tarix yazmağa çağırıblar. Nümayişdə “Trump, make history” yazılmış böyük banner diqqət çəkib. Etirazçılar D.Trampın israilli girovları azad edə biləcəyinə inanırlar.

Qeyd edək ki, avqustun son günlərində İsrailin müxtəlif şəhərlərində bu ölkənin Baş naziri Benyamin Netanyahuya müharibənin dayandırılması ilə bağlı çağırışlar ünvanlanır. HƏMAS isə girovları yalnız atəşkəs əldə olunduqdan sonra qaytaracağını açıqlayıb.