Nüfuz qazana bilməyən pul vahidi | Maraqlı araşdırma

ABŞ-də bəyənilməyən 2 dollarlıq əsginas nəyə görə digər ölkələrdə daha çox populyardır? Onun unikallığı nədən ibarətdir?

İki dollarlıq əsginasla bağlı çoxlu sirlər və əfsanələr mövcuddur. O təqdim olunduğu gündən Amerika vətəndaşları və bankları arasında nüfuz qazana bilməyib.

Səsləndirilən müxtəlif iddialardan biri ondan ibarətdir ki, o zaman kassa aparatlarında bu əsginaslar üçün ayrıca yer olmayıb. Başqa bir versiyaya görə, 2 dollar at yarışında standart mərc vasitəsi idi.

Digər bir fərziyədə isə deyilir ki, ABŞ-də səslərin alınmasına qadağa qoyulmazdan əvvəl səsvermənin qiyməti 2 dollar olub. Ona görə də bir şəxsin əlində bu əsginasın olması onun səsini satması anlamına gələ bilərdi.

Qeyd edək ki, 1966-cı ildə ABŞ Bankı iki dollarlıq əsginasların buraxılmasını dayandırıb. Daha sonra 1976 və 1995-ci illərdə məhdud sayda dövriyyəyə buraxılıb. Köhnə və kiçik tirajla buraxılan əsginaslar xüsusilə qiymətli hesab olunur. Bu baxımdan o, kolleksiyaçılar arasında daha da məşhurlaşıb.