Orban Trampın iqamətgahında | Baş nazirdən sabiq prezidentə çağırış

Vaşinqtonda keçirilən NATO-nun 75 illiyinə həsr olunmuş sammitdən sonra Macarıstanın Baş naziri Viktor Orban ABŞ-nin sabiq prezidenti Donald Trampla onun Floridada yerləşən iqamətgahında bir araya gəlib.

Görüş zamanı D.Trampın yenidən seçiləcəyini düşündüyünü deyən Macarıstanın hökumət rəhbəri hazırkı prezident Cozef Baydenin məğlub olma ehtimalının çox yüksək olduğunu vurğulayıb.

O, “sülh missiyası 5.0” adlandırdığı səfər çərçivəsində "Biz sülh əldə etməyin yollarını müzakirə etdik. Günün xəbəri isə budur ki, D.Tramp bunu edəcək!" paylaşımını edib.

Görüşlə bağlı xarici mediaya açıqlama verən Baş nazir sabiq ABŞ liderinin hər şeyə fərqli yanaşması ilə seçildiyini və öz üzərində çalışan bir insan olduğunu deyib:

"O, sülh adamıdır. Dörd illik səlahiyyəti müddətində o, heç bir müharibə başlatmadı və dünyanın bir çox ərazilərində gərginliyi aradan qaldırmaq üçün əlindən gələni etdi. Bizim hörmət qazanmış və sülh gətirə bilən liderlərə ehtiyacımız var. D.Tramp onlardan biridir! Geri qayıdın və yenidən regiona sülh gətirin, cənab Prezident”.

Bu arada Donald Tramp da öz növbəsində V.Orbana təşəkkür edərək sülhün vaxtının yetişdiyini deyib.

Məlumat üçün bildirək ki, Macarıstanın Baş naziri 2016-cı ildə də Donald Trampın prezidentliyə namizədliyini dəstəkləyən ilk və yeganə Avropa İttifaqı lideri olub.

Onu da qeyd edək ki, Viktor Orban Rusiyayönümlü fikirlərinə görə Avropada tez-tez tənqidə məruz qalsa da, Donald Trampın tərəfdarları və ABŞ-li mühafizəkarlar arasında olduqca populyar simadır.