Papa Leo Vatikanda Mahmud Abbasla görüşüb

Papa XIV Leo ilk dəfə olaraq Fələstin Prezidenti Mahmud Abbasla görüşüb. Onlar Qəzza zolağına humanitar yardımın çatdırılması və ikidövlətli həllə gedən yolu müzakirə ediblər.

“Danışıqlar zamanı Qəzzada mülki əhaliyə yardımın göstərilməsinə və ikidövlətli həll yolu ilə münaqişəyə son qoymağa təcili ehtiyac olduğu qəbul edilib”, – deyə məlumatda qeyd olunub.

Papa Fələstin Dövləti ilə Müqəddəs Taxt-Tac arasındakı dərin tarixi əlaqələrdən, Vatikanın Fələstin Dövlətini tanımasından danışıb. Həmçinin 2017-ci ildə iki tərəf arasında Anlaşma Memorandumunun imzalanmasından bəri bu münasibətlərin gücləndirilməsi üçün davam edən səyləri vurğulayıb.

Prezident Mahmud Abbas isə Papa Leoya ölkəsinə dəstəyinə görə təşəkkürünü bildirib. O, Qəzzada sülhün təmin edilməsi üçün dəstəyin davam etdirilməli olduğunu nəzərə çatdırıb.

Qeyd edək ki, görüş “Müqəddəs Taxt-Tac və Fələstin Dövləti arasında Hərtərəfli Saziş”in imzalanmasının 10-cu ildönümü ilə əlaqədar keçirilib. 26 iyun 2015-ci ildə imzalanan mətn hər iki tərəfin fələstinlilərin öz müqəddəratını təyin etməsi və ikidövlətli həll yoluna sadiqliyini ifadə edir.