Paşinyan arvadını bu ölkəyə niyə apara bilmir?

Ermənistan Baş naziri Nikol Paşinyan həyat yoldaşı Anna Akopyanı Yaponiya hökumətinin etirazı səbəbindən bu ölkəyə aparmayacaq.

Bu barədə “Hraparak” qəzeti məlumat yayıb.

Baş nazir avqustun 31-dən sentyabrın 1-dək Çində keçiriləcək Şanxay Əməkdaşlıq Təşkilatının sammitində, sentyabrın 3-də isə Çinin Yaponiya üzərində qələbəsinin 80-ci ildönümünə həsr olunmuş hərbi paradda iştirak edəcək.

Nəşr yazmışdı ki, N.Paşinyan xanımı ilə birlikdə Çindən birbaşa Yaponiyaya gedəcək. Amma onların Çində hərbi paradda iştirakı Yaponiyada xoşagəlməz hal kimi qarşılanıb. Xüsusilə Anna Akopyanın səfərdə iştirakı ilə bağlı çaşqınlıq ifadə olunub.

Baş nazirin mətbuat xidməti təsdiqləyib ki, Nikol Paşinyan sentyabrın 4-dən 2 günlük işgüzar səfərlə Yaponiyada olacaq. Amma Annasız...

“Anna Akopyan ərini Yaponiyaya səfərində müşayiət etməyəcək, regiona səfəri Çinlə başa çatacaq. Başqa sözlə, əldə etdiyimiz məlumat təsdiqlənib ki, Tokio N.Paşinyanın Yaponiyaya səfərinə əngəl törətməyə çalışıb və onun Çinin Yaponiya üzərində qələbəsinin 80-ci ildönümünə həsr olunmuş paradda iştirak etdikdən sonra “məğlub Yaponiya”ya səfər birmənalı qarşılanmayıb.

Əslində, bunlar Anna Akopyanın səfərinə etiraz olaraq ifadə olunub. Əldə etdiyimiz məlumata görə, etirazlar onların nikahının olmaması ilə bağlıdır. Yapon tərəfi birbaşa soruşub ki, Anna Akopyan kimdir, Ermənistanın Baş nazirini hansı əsasla müşayiət edir? Bizə bildirilib ki, Nikol Paşinyanı hansısa anket doldurmağa məcbur ediblər. O ana qədər səfərin baş tutub-tutmayacağı bəlli olmayıb. Amma Nikol Paşinyan səfərin baş tutması üçün əlindən gələni edib”, – nəşr yazıb.