Paşinyandan cəsarətli çıxış: Ermənistan KTMT-dən rəsmən üz döndərir

“Kollektiv Təhlükəsizlik Müqaviləsi Təşkilatını tərk etmək qərarı qəbul edilənə qədər siyasətimizdə dəyişiklik elan etmək fikrində deyilik”.

Bu barədə Ermənistan Baş naziri Nikol Paşinyan parlamentdə çıxışı zamanı bildirib.

N.Paşinyan deyib ki, İrəvan KTMT-dən çıxmaq üçün zəmin hazırlamır, əksinə, özünə və bloka düşünmək üçün vaxt verir.

Baş nazir təşkilat çərçivəsində tədbirlərdə iştirak etməməsinə də münasibət bildirib. Deyib ki, bu zaman ərzində Ermənistan hakimiyyətinin və KTMT-nin gələcək addımlar barədə qərar vermək imkanı olacaq:

“KTMT ilə münasibətlər kontekstində fundamental problem təşkilatın Ermənistanda məsuliyyət sahəsini müəyyən etməkdən faktiki imtina etməsidir. İrəvan KTMT missiyasının Ermənistana göndərilməsindən imtina etməyib, onun harada fəaliyyət göstərəcəyini müəyyənləşdirməyi xahiş edib.

KTMT isə Ermənistanın təhlükəsizliyinə təhdidlərlə bağlı İrəvanın çoxsaylı bəyanatlarına heç vaxt cavab verməyib. Hazırda hakimiyyət təhlükəsizlik sahəsində əlaqələri şaxələndirir, yeni tərəfdaşlar, yeni silah tədarükçüləri axtarır.

Hökumət KTMT-dən çıxmaq barədə qərar qəbul olunmayana qədər siyasi kursun dəyişməsi barədə açıqlama vermək niyyətində deyil. Əks halda bu, uyğunsuzluğa səbəb olacaq”.

Qeyd edək ki, Nikol Paşinyan Minskdə keçiriləcək KTMT-nin sammitinə qatılmaqdan imtina edib. Kremlin sözçüsü Dmitri Peskov isə Baş nazirin qərarından təəssüfləndiklərini bildirib.